തൃശൂര്: പൂരനഗരിയിലേക്ക് ആംബുലന്സില് എത്തിയ സംഭവത്തില് കേന്ദ്രമന്ത്രി സുരേഷ് ഗോപിക്കെതിരെ കേസെടുത്തു. സിപിഐ നേതാവായ അഡ്വ. സുമേഷ് നല്കിയ പരാതിയില് തൃശൂര് ഈസ്റ്റ് പൊലീസ് ആണ് കേസെടുത്തത്. ആംബുലന്സ് നിയമവിരുദ്ധമായി ഉപയോഗിച്ചെന്നാണ് എഫ്ഐആര്. സുരേഷ് ഗോപിക്ക് പുറമേ അഭിജിത്ത് നായര്, ആംബുലന്സ് ഡ്രൈവര് എന്നിവരെയും കേസില് പ്രതി ചേര്ത്തിട്ടുണ്ട്.
ഞായറാഴ്ച പുലര്ച്ചെയാണ് സുരേഷ് ഗോപിക്കെതിരെ പൊലീസ് എഫ്ഐആര് രജിസ്റ്റര് ചെയ്തത്. ഐപിസി 279,34 വകുപ്പുകള്, മോട്ടോര് വാഹന നിയമം 179, 184, 188, 192 എന്നീ വകുപ്പുകള് ചുമത്തിയാണ് കേസെടുത്തിട്ടുള്ളത്. ലോക്സഭാ ഇലക്ഷന് പ്രചാരണ തന്ത്രത്തിന്റെ ഭാഗമായി രോഗികളെ മാത്രം കൊണ്ടുവരാന് അനുവാദമുള്ള ആംബുലന്സ് ഉപയോഗിച്ചു. പൂരത്തിന്റെ ഭാഗമായ വാഹന നിയന്ത്രണം നിലനില്ക്കെ അത് ലംഘിച്ചുകൊണ്ട് ആംബുലന്സ് റൗണ്ടിലൂടെ ഓടിച്ചു. മനുഷ്യജീവന് ഹാനി വരുത്താന് സാധ്യതയുള്ള രീതിയില് ജനത്തിനിടയിലൂടെ അപകടകരമായ രീതിയില് ആംബുലന്സ് ഓടിച്ചെന്നും എഫ്ഐആറില് പറയുന്നു.
